Mohammed Ali Hamadei
Nahiyar Near East – Yammacin Afirka da Gabas ta Tsakiya
Lada Don Adalci na ba da tayin lada da ya kai dalar Amurka miliyan 5 don bayanai kan Mohammed Ali Hamadei, wanda kuma aka sani da Ali Hamadei and Castro. Hamadei da ake zargi da zama mamban Hizballah, ana nemansa ne saboda hannunsa a yin garkuwa da jirgin TWA Flight 847 a shekarar 1985.
A ranar 14 ga Yunin 1985, ‘yan ta’adda suka karkatar da jirgin saman na TWA Flight 847 daga Athens zuwa Rome. Tsawon kwana 17 aka tilasta wa jirgin ya yi ta shawagi a saman Tekun Mediterranean ɗauke da fasinjoji 153 da ma’aikata daga Beirut zuwa Algiers, inda ya yi ta yin hakan kuma ya sauka Beirut har sau uku. A tsayawarsa ta farko a Beirut, masu garkuwar suka dinga dukan wani sojan Amurka Robert Stethem, sannan daga baya suka harbe shi.
A ranar 14 ga Nuwamban 1985 aka gano laifin Hamadei bisa rawar da ya taka a garkuwa da jirgin. An kama shi a filin jirgi na Frankfurt ranar 13 ga Janairun 1987. Amurka ta nemi a miƙa mata shi amma gwamnatin Jamus ta yanke shawarar yi wa Hamadei shari’a, kuma a watan Mayu na 1989 aka yanke masa hukunci bisa laifin kisa da yin garkuwa da kai hari da kuma karkatar da jirgi. An yanke wa Hamadei hukuncin ɗaurin rai-da-rai. Sai dai kuma a ranar 15 ga Disamban 2005, an sake shi daga gidan yari. Hamadei ya koma Beirut, inda ake tunanin yana zaune.
A ranar 12 ga Oktoban 2001, Ma’aikatar Harkokin Wajen Amurka ta ayyana Hamadei a matsayin Ɗan Ta’adda na Duniya bisa Umarnin Shugaban Ƙasa na Executive Order 13224, wanda aka yi wa kwaskwarima. Sakamakon hakan, baya ga sauran abubuwa, an hana Hamadei taɓa duk wata dukiya ko kadarori da ya mallaka da ke ƙarƙashin ikon Amurka, sannan an haramta wa Amukawa yin hulɗar kuɗi da Hamadei. Ƙari a kan haka, laifi ne mutum ya samar ko ya yi yunƙurin samarwa ko ya haɗa baki wajen samar wa Hizballah kayayyaki ko taimako, wadda Amurka ta ayyana Ƙungiyar Ta’addanci ta Ƙasashen Waje. Hamadei na cikin jerin waɗanda FBI ta fi nema.
